निर्वाचन आयोगले देशभरका सबै स्थानीय तहमा निर्वाचन अधिकृत तोकेको छ ।
आयोगले सार्वजनिक सूचना मार्फत ७७ वटै जिल्लामा मुख्य निर्वाचन अधिकृत र ६ सय ७६ जना निर्वाचन अधिकृत तोकिएको जनाएको हो । जिल्ला सदरमुकाम रहेका स्थानीय तहमा सम्बन्धित जिल्ला अदालतका जेष्ठ न्यायाधीशलाई मुख्य निर्वाचन अधिकृत तोकेको छ ।
अन्य स्थानीय तहमा जिल्ला न्यायाधीश, न्याय सेवाका उपसचिवहरु र निजामती सेवाका उपसचिवहरु रहने गरी निर्वाचन अधिकृत तोकिएको छ ।
आयोगले यही चैत मसान्तदेखि वैशाख २ गतेसम्म सबै निर्वाचन अधिकृतलाई चुनावका लागि अभिमुखीकरण तालिम पनि दिईने जनाएको छ ।
सँगसँगै ः
स्थानीय तह निर्वाचनका लागि अन्तिम मतदाता नामावली सार्वजनिक
निर्वाचन आयोगले आगामी वैशाख ३० गते हुने स्थानीय तह निर्वाचनका लागि अन्तिम मतदाता नामावली सार्वजनिक गरेको छ ।
आयोगले आइतबार सार्वजनिक गरेको विवरणअनुसार कूल मतदाता एक करोड ७७ लाख ३३ हजार ७२३ रहेका छन् ।
कुल मतदातामध्ये पुरुषको संख्या बढी छ । आयोगका अनुसार पुरुष मतदाता ८९ लाख ९२ हजार १० र महिला मतदाता ८७ लाख ४१ हजार ५३० रहेका छन् । यस्तै, यौनिक तथा लैंगिक अल्पसंख्यक समुदायका १८३ जना मतदाता छन् ।
आयोगले २०७४ सालको स्थानीय निर्वाचनमा भन्दा यस पटक ३६ लाख ६१ हजार १९९ जना नयाँ मतदाता थपिएको जनाएको छ । यसपटक सबैभन्दा बढी मतदाता मोरङमा ७ लाख १५ हजार २ सय २३ जना र सबैभन्दा कम मनाङमा ६ हजार ४ सय ९६ मतदाता रहेका छन् । मतदाता नामावलीमा नाम समावेश भएर निर्वाचनको अघिल्लो दिनसम्म १८ वर्ष उमेर पुगेकाहरुले यसपटकको निर्वाचनमा मतदान गर्न पाउने आयोगले जनाएको छ ।
आयोगले ७५३ स्थानीय तहका लागि १० हजार ७५३ मतदान स्थल र २१ हजार ९५५ मतदान केन्द्र तोकिएको जनाएको छ ।
